An eiser Artikel-Serie “3 Froen un …” loosse mir Experten an Organisatiounen direkt zu Wuert kommen. Den Dr Erik Schneider ass Spriecher a Koordinator vun Intersex & Transgender Lëtzebuerg.

Eise Veräin Intersex & Transgender Luxembourg a.s.b.l. huet sech als Zil gesat, d’Liewenssituatioun vu Mënschen zu Lëtzebuerg ze verbesseren, di de momentane Geschlechternormen net entspriechen. Dat erreeche mir duerch d’Weidergi vun  Informatiounen un Eenzelpersounen a Gruppe vun interesséierte Fachwëssenden, Privatpersounen an un d’Ëffentlechkeet.

Mir hunn 3 Themenschwéierpunkten:

Trans‘ (mat senge Variatiounen): Heibäi handelt et sech ëm Mënschen, där hir Geschlechtsaschreiwung bei der Gebuert net mat hirer geschlechtlecher Selbstwahrnehmung (och Geschlechtsidentität genannt) iwwertenee stëmmt.

Intersex (och Intergeschlechtlechkeet) leit vir, wann bei engem Mënsch di kierperlech Geschlechtsmierkmoler* net all engem Geschlecht entspriechen. Dann handelt et sech ëm Variatioune vun de Geschlechtsmierkmoler. (*gemäß medezinescher Normen)

Als net-binär bezeechnen sech Mënschen, di sech net an de binäre Geschlechterkategorien (weiblech/männlech) rëmfannen. Hiert Geschlechtsemfanne ka fléissend , dat heescht wiesselend sinn, di zwee Geschlechterkategorien ëmfaassen, guer net virleien oder sech nach aneschters duerstellen.

Individualbegleedung: op Nofro

Jugend- an Elteregruppen: jeeweils eng Kéier am Mount

Familljen- an aner Veräinstreffen: 2-3mol d’Joer

Heefeg gestallte Froe vun deene Jonke sinn ënner anerem:. „Sinn ech trans‘?“, „Wéi reagéiere meng Elteren?“, “Wëll ech e Comingout maachen (mech anere matdeelen) oder stealth (onsiichtbar als transPersoun) liewen? Wa jo, wéi?“, „Wat muss ech man, fir Hormoner ze kréien?“, „Wéi geet dat, mat der Ännerung vum Virnumm a Geschlecht fir d’Pabéieren?“, „Wat kann ech bei Problemer an der Schoul oder doheem man?“